Данил Алексеевич 1886 сыллаахха Өрт күөлгэ төрөөбүтэ. Төрөөбүт күнэ биллибэт, эрээри архыыпка атырдьах ыйын 9 күнүгэр төрөөбүт диэн сурук баар. Лаппарыйа тимир, мас, көмүс ууһа. Уһанарга кыра эрдэҕинэ ийэтэ сыһыарбыта, булт, балык, дьиэҕэ туттуллар тэрили ийэтэ бэйэтэ оҥороро, көмүлүөккэ быһах охсоро. Сэрии кэмигэр колхозтарга, совхозтарга үлэлээбитэ, уһанар да этэ. 1955 сыллаахха Москваҕа, ВДНХаҕа быыстапкаҕа Саха делегациятын састаабыгар киирсэн бара сылдьыбыта.
Сергей Зверев Лаппарыйа талаанын көрөн, ансаамбылыгар барытыгар хомус оҕустарбыта. Данил Алексеевич хомуһун эрдэ охсон бүтэн, Сергей Зверевы сөхтөрбүтэ диэн кэпсээн баара. Лаппарыйа бэйэтэ да хомустуурун сөбүлүүрэ.
Лаппарыйа аатынан нэһилиэк киин уулуссата ааттанар.

Чааркаан Даарыйа 1872 сыллаахха Хадан нэһилиэгэр төрөөбүтэ. Онтон Агитаторга кэлэн олорбута. Үөр сылгылаах, ынахтаах, көлүүр оҕустаах баайдык олорбут үһү. Сүдү күүстээх этээччи, үҥкүүһүт, олоҥхоһут, тойуксут. Ыалы кэрийэ сылдьан олоҥхолуур, остуоруйалыыр идэлээҕэ, ону дьон барыта интириэһиргээн истэн олороллоро үһү. Ыһыахтарга ыҥырыылаах ыалдьыт. Эр киһи курдук сэниэлээҕэ үһү, дьиэтин оттунаары тиити охторон, сүгэн киирэрэ үһү. 101 саастааҕар өлбүтэ.

1919 сыллаахха Арыылаахха төрөөбүтэ. Сэрии кэмигэр совхозка балыксытынан үлэлээбитэ, онтон Кэмпэндээйигэ таас чох хаһыытыгар сылдьыбыта. Сэмэн оройуон үҥкүүһүттэрин бастыҥнарын ахсааннарыгар киирэрэ. Уулаах Атах ыһыахтарыгар, 10-ча тыһыынчалаах дьоннордоох бу саха кэрэ бырааһынньыгар добун бириистэри биири да көтүппэккэ ыла сылдьыбыт. Улуу Кыайыыны айхаллыыр оройуон ыһыаҕын кини аспыта. Аҥардас үҥкүү тыла этээччи эрэ диир сыыһа буолуо, эдэр сылдьан олоҥхолуур үгэстээх үһү.