1906 сыллаахха Кулуһуннаахха төрөөбүтэ. Ыраахтааҕы былааһын саҕана төрөөбүт буолан, үөрэммэккэ сэниэ ыалларга дьиэ үлэһитинэн сылдьыбыта.
Советскай былаас олохтонон колхозтар тэриллэн барбыттарыгар кэргэнэ Яковлев Николай Семеновичтыын "Кулуһуннаах" артыалга чилиэнинэн киирбиттэрэ. Варвара оҕолорун көрө-көрө фермаҕа арыыһытынан үлэлээн, быа хатан, бурдук быһан, от оттооһунугар сылдьыбыта.
Яковлева Варвара Алексеевна ССРС Үрдүкү Сэбиэтин Президиумун 1946с. от ыйын 30 күнүнээҕи ыйааҕынан "Дьоруой Ийэ" аат иҥэриллибитэ.

1932 сыллаахха Аллыҥа нэһилиэгэр төрөөбүтэ. 16-17 сааһыттан ыанньыксытынан үлэлээбитэ. 1955 сыллаахха олоҕун аргыһын Сергеев Прокопий Ильиһы көрсөн ыал буолбуттара. 50 тахса сыл бииргэ олорон, 11 оҕону төрөтөн, биэбэйдээн, киһи хара оҥорбуттара.
Саввинова Татьяна Егоровна ССРС Үрдүкү Сэбиэтин Президиумун 1978сыл ыам ыйын 17 күнүнээҕи Ыйааҕынан "Дьоруой Ийэ" аат иҥэриллибитэ.

1936 сыллаахха Көҕүөргэ төрөөбүтэ. 16 сааһыттан бочуоттаах сынньалаҥҥа тахсыар диэри ыанньыксытынан үлэлээбитэ. Сүөһү иитиитин маастара. 1957 сыллаахха Сидоров Петр Егоровичтыын күүстэрин холбоон ыал буолбуттара. Аҕыс уол, икки кыыс оҕоломмуттара.
Саввинова Мария Андреевна ССРС Үрдүкү Сэбиэтин Президиумун 1974с. кулун тутар 25 күнүнээҕи Ыйааҕынан "Дьоруой Ийэ" аат иҥэриллибитэ.

1937 сыллаахха Кулуһуннаахха төрөөбүтэ. Оҕо эрдэҕиттэн ыарыһах буолан оскуолатыттан эрдэ уурайан, 1958 сылтан колхозка үлэлээн барбыта. "Быллаат" ыччат-комсомольскай пиэрмэтигэр ыанньыксыттыы сылдьан, үүт ыамыгар үрдүк көрдөрүүтүн иһин комсомол обкомун Грамотатынан наҕараадаламмыта. Кэлин биэнсийэҕэ тахсыар диэри ньирэй көрөөччүнэн үлэлээбитэ. Сүөһү итиитин маастара. 1960с. Кузьмин Владимир Константиновичка кэргэн тахсыбыта. 10 оҕону төрөтөн, иитэн-аһатан атахтарыгар туруорбуттара. Оҕолоро үлэни таптыыр дьон буола иитиллибиттэрэ.
Габышева Евдокия Ивановнаҕа ССРС Үрдүкү Сэбиэтин Президиумун 1981с. олунньу 26 күнүнээҕи Ыйааҕынан "Дьоруой Ийэ" аат иҥэриллибитэ.

1927с. Сымалаахха төрөөбүтэ. Сэрии сылларыгар төгүрүк тулаайах хаалан, "Агитатор" колхозка сайын үүт учуоттаан, от оттоһон, кыһын бурдук астааһыныгар үлэлээбитэ. 1946-1948сс. Аллыҥа нэһилиэгэр сэбиэккэ сикиритээрдээбитэ. Онтон уурайан 1949с. ветеринарнай санитардар куурустарыгар үөрэнэн, 1953с. диэри санитарынан үлэлээбитэ. 1949с. Петр Степанович Семеновка кэргэн тахсан ыал буолбуттара. Иллээхтик, дьоллоохтук олорон, 7 уол, 3 кыыс оҕоломмуттар. 1967-1970сс. оҕо саадыгар үлэлээбитэ, ол кэннэ хонтуораҕа остуорастаабыта.
Николаева Екатерина Никитичнаҕа ССРС Үрдүкү Сэбиэтин Президиумун 1971с. ахсынньы 29 күнүнээҕи Ыйааҕынан "Дьоруой Ийэ" аат иҥэриллибитэ. "1941-1945сс. Аҕа дойдуну көмүскүүр Улуу сэриигэ килбиэннээх үлэтин иһин" мэтээлинэн наҕараадаламмыта.

1927 сыллаахха Сунтаарга Лоҥкур Уолбута диэн алааска төрөөбүтэ. Сэрии сылларыгар колхозка бурдук ыһыытыгар, от үлэтигэр, бурдук хомууругар, астааһыныгар, сүөһү көрүүтүгэр улахан дьону солбуйан көрбүтэ. Сэрии кэнниттэн Ефимов Николай Васильевиһы көрсөн, сүрэхтэринэн холбоһон ыал буолбуттара. 1963 сылтан бөһүөлэккэ олохсуйан баанньык оттооччуннан үлэлээбитэ. 12 оҕоҕо күн сирин көрдөрбүттэрэ.
Ефимова Матрена Митрофановнаҕа ССРС Үрдүкү Сэбиэтин Президиумун 1969 сыл ахсынньы 29 күнүнээҕи Ыйааҕынан "Дьоруой Ийэ" аат иҥэриллибитэ.

1954c. Ленскэй оройуонугар Нуотараҕа төрөөбүтэ. Тойбохой интэринээт-оскуолатын бүтэрэн, комсомол путевкатынан Аллыҥа отделениетыгар пиэрмэҕэ үлэлии тахсыбыта. 1975с. Федосий Петрович Ивановтуун ыал буолан, 10 оҕону төрөтөн, бүөбэйдээн атахтарыгар туруорбуттара. Кэлин өр сыл "Үрүйэчээн" оҕо саадыгар үлэлээбитэ.
Иванова Раиса Алексеевнаҕа Саха Өрөспүүбүкэтин Бэрэсидьиэнин 1995с. бэс ыйын 15 күнүнээҕи Ыйааҕынан "Ийэҕэ үрдүкү махтал" ибэлиэ анаммыта.

1964с. Аллыҥаҕа төрөөбүтэ. Тойбохой орто оскуолатын бүтэрбитэ. Комсомол путевкатынан Аллыҥа отделениетыгар ыанньыксытынан ананан кэлэн үлэлээбитэ. 1982с. В. П. Петровтуун аал уот оттон, алаһа дьиэ тэринэн ыал буолбуттара. 14 оҕоҕо күн сирин көрдөрбүттэрэ.
Саха Өрөспүүбүлүкэтин Ил Дарханын 2017 сыл сэтинньи 16 күнүнээҕи Ыйааҕынан СӨ "Дьоруой Ийэ" диэн бэлиэнэ наҕараадаламмыта.

1959 сыллаахха Аллыҥаҕа төрөөбүтэ. Аллыҥа отделениетыгар ыанньыксытынан, үүт тутааччыннан, лабараанынан, ол кэннэ бочуоттаах сынньалаҥҥа тахсыар диэри оскуолаҕа үлэлээбитэ. 1981с. Сидоров Андрей Петровичтыын холбоһон 10 оҕоҕо күн сирин көрдөрбүттэрэ.
Сидорова Валентина Григорьевнаҕа Саха Өрөспүүбүлүкэтин Бэрэсидьиэнин 1999с. ахсынньы 8 күнүнээҕи Ыйааҕынан "Ийэҕэ үрдүкү махтал" бэлиэ анаммыта.